ლივერპულმა ამხანაგურ მატჩში მანჩესტერ იუნაიტედი გაანადგურა

აშშ-ში გამართულ ამხანაგურ მატჩში არნე სლოტის ლივერპულმა ერიკ ტენ ჰაგის მან იუნაიტედი 3:0 გაანადგურა.

მერსისაიდული კლუბის რიგებში თავის გამოჩენა ფაბიო კარვალიომ (10'), კურტის ჯონსმა (36') და ციმიკასმა (61') მოახერხეს.

მეორე ნახევარში მწვრთნელებმა თითქმის სრულიად განსხვავებული შემადგენლობებით ითამაშეს და შანსი ახალგაზრდებსაც მისცეს.

მანჩესტერისთვის ეს მე-5 ამხანაგური მატჩი იყო, გუნდმა როსენბორგთან 0:1 წააგო, რეინჯერსს 2:0 მოუგო, არსენალთან 1:2 დათმო, ბეტისს 3:2 სძლია და დღეს 0:3 დამარცხდა. გუნდი მომდევნო მატჩს ინგლიის სუპერთასზე მან სიტის წინააღმდეგ გამართავს 10 აგვისტოს.

სლოტის ლივერპულმა, რომელსაც, სხვათაშორის, ამ ზაფხულს ჯერ არცერთი ტრანსფერი არ განუხორციელებია, მესამე მატჩი გამართა და სამივეში შეძლო გამარჯვების მოპოვება - 27 ივლისს გუნდმა ბეტისს 1:0 მოუგო, 1 აგვისტოს არსენალს 2:1 სძლია, დღეს კი 3:0 იმარჯვა.

პრესეზონის დასრულებამდე ლივერპული 11 აგვისტოს სევილიას დაუპირისპირდება ამხანაგურ მატჩში, სეზონს კი 17 აგვისტოს, იპსვიჩთან მატჩით გახსნის.