ნოვაკ ჯოკოვიჩი ATP-ს სეზონის შემაჯამებელი ტურნირიდან მოეხსნა.
სეზონის შემაჯამებელი ტურნირი ტურინში გაიმართება და მასში მონაწილეობას 8 საუკეთესო ჩოგბურთელი მიიღებს. ნოვაკმა მონაწილეობის უფლება მოიპოვა, თუმცა მისივე თქმით, ტრავმის გამო ვერ ითამაშებს.
„დიდი პატივია, რომ ტურინის სეზონის ფინალზე მოხვედრა მოვახერხე, მოუთმენლად ველოდი იქ ყოფნას, თუმცა მიმდინარე ტრავმის გამო, მომდევნო კვირაში თამაშს ვერ მოვახერხებ. ბოდიში იმათთან, ვისაც ჩემი იქ ხილვა უნდოდა.
ყველა ჩოგბურთელს ვუსურვებ კარგ ტურნირს, მე კი მალე გნახავთ." - წერს ინსტაგრამ სთორიში ნოვაკ ჯოკოვიჩი.
ნოვაკი ტურნირის მოქმედი გამარჯვებულია და ტიტულის ვერ დაცვით დაახლოებით 1500 ქულას დაკარგავს და სავარაუდოდ, რეიტინგში, რომელშიც ახლა მე-5 პოზიციას იკავებს, კიდევ უფრო დაქვეითდება.
ამ მომენტისთვის ოფიციალურად ცნობილი არ არის, ვინ შეცვლის ნოვაკს ამ ტურნირზე. თუმცა რეიტინგის მიხედვით, ფავორიტები კასპერ რუუდი და ანდრეი რუბლევი არიან.
Nitto Atp Finals ტურინში, 10-17 ნოემბერს გაიმართება.
