თიბილაშვილი: "ეს მედალი ჩემთვის ოქროა"

ნინო თიბილაშვილმა პარიზის პარალიმპიადაზე ბრინჯაოს მედლის მოპოვების შემდეგ კომენტარი გააკეთა.

"ეს ჩემი მეორე პარალიმპიადაა. რა თქმა უნდა, მონაწილეობის გამოცდილება მქონდა, თუმცა წინა ოლიმპიადაზე არ იყო გულშემატკივარი კოვიდის გამო და ახლა ეს გავსებული დარბაზი და ეს ყველაფერი იმდენად მძაფრ ემოციებს იწვევდა ჩემში, რომ ვეცადე ჩემი საუკეთესო მეჩვენებინა.

მართალია, ოქრო არ არის, მაგრამ ეს მედალი ჩემთვის ოქროა, რადგან ძალიან რთული და დაძაბული შეხვედრები გავიარე. მადლობა ჩემს ყველა მოწინააღმდეგეს გაწეული წინააღმდეგობისთვის და ყველას ვუსურვებ წარმატებას. საქართველო, გილოცავ!" - განაცხადა თიბილაშვილმა პირველ არხთან.

ქართველმა პარამოფარიკავემ კარიერაში მეორე პარალიმპიური მედალი მოიპოვა. ის ტოკიო 2020-ზე ვერცხლის პრიზიორი გახდა. თიბილაშვილი არის პირველი ქართველი პარასპორტსმენი, რომელსაც 2 პარალიმპიური მედალი აქვს.

მე-3 მედალი პარალიმპიადაზე - თიბილაშვილი ბრინჯაოს პრიზიორია!

საქართველოს დელეგაციის ანგარიშზე პარიზში უკვე 3 მედალია - ანა ჯაფარიძე (ბრინჯაო), გიგა ოჩხიკიძე (ოქრო) და ნინო თიბილაშვილი (ბრინჯაო).