სერია ა-ს მე-12 ტურის ცენტრალურ შეხვედრაში ერთმანეთს ჩემპიონატის ლიდერები, მილანის ინტერი და ნაპოლი დაუპირისპირდებიან.
11 ჩატარებული მატჩის შემდეგ, სატურნირო ცხრილს სწორედ ეს ორი გუნდი ლიდერობს - ნაპოლი 25 ქულით პირველ ადგილზეა ინტერს კი 24 ქულა აქვს და მე-2 პოზიციას იკავებს.
ანტონიო კონტეს გუნდი ცხრილს უფრო კომფორტულადაც ლიდერობდა, თუმცა წინა ტურში ატალანტასთან სენსაციურად 0:3 წააგო და ინტერს მაქსიმალურად მიახლოვების საშუალება მისცა.
დღეს, ჯუზეპე მეაცაზე გამარჯვებით იტალიის ჩემპიონი ცხრილის სათავეში მოქცევასაც მოახერხებს, თუმცა კონტეს სხვა გეგმები აქვს და თავისი ყოფილი გუნდისთვის ხელის შეშლას ყველანაირად შეეცდება.
თავის მხრივ, ძალიან პრინციპული მატჩი ელის ქართველ ხვიჩა კვარაცხელიასაც, რომელიც ნაკრებში ჩამოსვლამდე თავის ბოლო თამაშს ატარებს ნაპოლის რიგებში.
იტალიაში გადასვლის შემდეგ, კვარაცხელიამ ინტერის წინააღმდეგ 5 მატჩი ჩაატარა (4 ჩემპიონატში, 1 თასზე) და მხოლოდ ერთხელ შეძლო გამარჯვების მოპოვება (წინა სეზონში 3:1), ერთი მატჩი ფრედ დასრულდა (1:1), 3-ჯერ კი დაპირისპირებიდან გამარჯვებული ინტერსი გამოვიდა.
ინტერის წინააღმდეგ ხუთივე მატჩი კვარაცხელიამ სასტარტო შემადგენლობაში დაიწყო, თუმცა ამ დრომდე ვერცერთ მატჩში ვერ შეძლო გოლით ან საგოლე პასით თავის გამოჩენა.
თითქმის ანალოგიური სტატისტიკა ჰქონდა კვარას მილანთან მატჩის წინაც, თუმცა ქართველმა იმავე სან სიროზე, რომელზეც დღეს ითამაშებს, შორეული დარტყმით მოახერხა მაიკ მენიოს კარის აღება და ნაპოლის გამარჯვების მოპოვებაში დაეხმარა.
გარკვეულ უპირატესობას პარტონოპეის ამ მატჩში ის აძლევს, რომ გუნდი მთელი კვირა უშუალოდ ინტერთან დაპირისპირებისთვის ემზადებოდა. ნერაძურიმ კი, თავის მხრივ, შუა კვირაში არსენალთან დამქანცველი თამაში ჩაატარა და მართალია 1:0 მოიგო, მაგრამ ფეხბურთელებს სასურველი შედეგის მისაღწევად სერიოზული ძალისხმევის გაღება დასჭირდათ.
სავარაუდო შემადგენლობები
ინტერი: ზომერი, პავარი, აჩერბი, ბასტონი, დარმიანი, ბარელა, ჩალჰანოღლუ, მხითარიანი, დიმარკო, ტურამი, მარტინესი
ნაპოლი: მერეტი, დი ლორენცო, რაჰმანი, ბონჯორნო, ოლივერა, ანგისა, ლობოტკა, მაკტომინეი, პოლიტანო, კვარაცხელია, ლუკაკუ.
