ინგლისის პრემიერ ლიგის მე-12 ტურში ლესტერმა საკუთარ მოედანზე ჩელსი მიიღო. მატჩი საინტერესო იმით იყო, რომ ლონდონელთა მთავარი მწვრთნელი, ენცო მარესკა ყოფილ გუნდს უპირისპირდებოდა.
ანგარიში მე-15 წუთზე ნიკოლას ჯექსონმა გახსნა, რომელმაც ბურთი მეტოქის საჯარიმოში ეფექტურად დაამუშავა და კარისკენ გადაგზავნა.
32-ე წუთზე თავი ნონი მადუეკემაც გამოიჩინა, თუმცა თამაშგარე მდგომარეობის გამო გოლი არ ჩაითვალა და ჩელსიმ პირველი ტაიმი 0-1 მოიგო.
75-ე წუთზე ლონდონელებმა უპირატესობა მაინც გაზარდეს. ანგარიში 0-2 ენცო ფერნანდესმა გახადა.
თამაშის ბოლოს მასპინძლებმა პენალტის დარტყმის უფლება მიიღეს და 95-ე წუთზე სხვაობა ჯორდან აიუმ შეამცირა, თუმცა ლესტერს დრო აღარ ეყო და 3 ქულა ჩელსის დარჩა, მარესკამ კი ყოფილი გუნდი დაამარცხა.
12 ტურის შემდეგ ენცო მარესკას გუნდს 22 ქულა დაუგროვა და სატურნირო ცხრილში მე-3 ადგილზე იმყოფება. მეორეადგილოსან მანჩესტერ სიტისთან ჩამორჩენა 1 ქულაა, თუმცა ქალაქელებს თავის მხრივ მატჩი აქვთ ჩასატარებელი.
ლესტერს 10 ქულა რჩება და მე-16 პოზიციაზეა, გასავარდნ ზონასთან სხვაობა 3 ქულაა.
