ჩემპიონთა ლიგის პირველი საკვალიფიკაციო ეტაპის განმეორებით მატჩში დინამო ბათუმმა აჭარაბეთ არენაზე ლუდოგორეცს უმასპინძლა.
საქართველოს ჩემპიონმა მეტოქე 1-0 დაამარცხა, თუმცა ეს შედეგი ორი მატჩის ჯამში შემდეგ ეტაპზე გასასვლელად საკმარისი არ აღმოჩნდა.
შეხვედრაში ანგარიში სწრაფი გოლით გაიხსნა. მე-3 წუთზე ვლადიმერ მამუჩაშვილმა შეძლო ბათუმელთა დაწინაურება. მე-9 წუთზე მამუჩაშვილი უკვე დუბლს ასრულებდა, თუმცა მსაჯმა გოლი საეჭვო ვითარებაში არ ჩათვალა. გოლის დროს თავდასხმაში ჯარიმა დაფიქსირდა, თუმცა ეს გამეორებაზე ასეთი აშკარა არ იყო.
ბათუმელებმა მატჩის ბოლომდე ცდა არ დააკლეს, განსაკუთრებით ბოლო წუთებზე იყო მომენტები სტუმართა კართან. ერთხელ ბურთი ძელსაც მოხვდა, რაზგრადელების მეკარეს კი 4 მოგერიება დაუგროვდა.
დინამომ გამარჯვება მხოლოდ ერთბურთიანი სხვაობით მოახერხა, პირველი მატჩი კი გუნდმა 3-1 დათმო, შესაბამისად ჯამში მოგებული ლუდოგორეცი აღმოჩნდა და ჩემპიონთა ლიგის საკვალიფიკაციო ეტაპის შემდეგ ეტაპზე გავიდა.
დინამო ბათუმი კი ასპარეზობას კონფერენს ლიგის საკვალიფიკაციო ეტაპზე გააგრძელებს, სადაც მეტოქედ მონტენეგროს წარმომადგენელი დეჩიჩი ეყოლება.
პირველი მატჩი 25 ივლისს ბათუმში, აჭარაბეთ არენაზე გაიმართება.
